الرئيسية / / الدليل الشامل لأحلى الأكلات الشعبيه الخاصه بعيد الاضحى المبارك كل عام وأنتم بخير

الدليل الشامل لأحلى الأكلات الشعبيه الخاصه بعيد الاضحى المبارك كل عام وأنتم بخير

ملف كامل لأحلى الأكلات الشعبيه الخاصه بعيد الاضحى المبارك كل عام وأنتم بخير، مجموعة كبيرة من وصفات عيد الأضحى المبارك، أشهر وأحلى أكلات العيد من مطبخ بيت العيلة.
لقد جمعت فى هذا الموضوع 16 أكلة وطبخة متنوعة من أشهر طرق عمايل أحلى أكلات عيد الأضحى، وهذا موضوع شامل للجميع ويمكنكم مشاهدتة وتصفحة فى أى وقت على موقعنا، وهذا الموضوع أخذ منى مجهود كبير للاقبال الشديد من زوار الموقع وأعضاء صفحة مطبخ بيت العيلة بمناسبة عيد الأضحى المبارك وكل عام والامة الاسلامية بخير وفى صحة وسعادة. 

1- فته الكوارع المصريه

طريقة عمل فتة الكوارع المصرية
طريقة عمل فتة الكوارع المصرية



المقـــاديـر وطريقة تحضير فتة الكوارع المصرية

الكوارع طبعا تتغسل كويس وتتنقع فى مياة وخل ودقيق، وبعدين نششوحها فى شويه زيت ذره أو زبده، ونضيف بصل وكرفس وجزر وورق لورا وحبها وقرفه أعواد وبهارات ومياه مغليه وتسيبها عشان تستوى ثم تصفى من الشربه وتترك على جانبا تبرد ثم نحمرها في 2 ملعقة سمنه بلدي.
عمل صلصه الكوارع
طاسه نضع سمنه يحمر 7 فص توم مفروم وننزل عليه بالكسبره الجافه ويقلب وننزل بصلصه الطماطم وعصير الطماطم ويقلب جيدا ونضيف قليل من شربه الكوارع وملح وفلفل.
لعمل طشه الخل بالثوم
طاسه نضيف سمنه يحمر الثوم ننزل بالكسبره الجافه ونقلب وننزل بالخل و جزء من شربه الكوارع وملح وفلفل ومعلقه من صوص الطماطم اللى جاهز مسبقا.
بعد ذلك يقطع الخبز قطع صغيرة وياخذ ذبده وثوم ويحمص في الفرن.
طريقه التقديم
نضيف للعيش شربه كوارع ساخنه ويشرب جيد، ونضيف طبقه ارز فوق العيش ونرش فوق الارز صلصه طماطم وطشه الخل وترص الكوارع وتقدم بجوارها مزيد من صلصه الطماطم والطاشه.
وبالف هنا على صحتكم الغالية.


2- الممبار المصرى

طريقة تحضير الممبار المصرى
طريقة تحضير الممبار المصرى

المقادير
كيلوا ممبار منظف جيدا
كيلوا أرز
بصلتين مفروم صغير
3 طماطم مفروم صغير
2 ثمره فلفل مفروم صغير
ربطه شبت, بقدونس , كسبره
4 ملاعق صلصه
2 ملعقة كبيرة سمنه
3 ملاعق زيت
ملح , فلفل , بهارات , قرفه , حبهان وورق لورا وقرنفل بشرة جوزة الطيب
مكعب مرقه دجاج


طريقة تحضير الممبار المصرى

أولا ننقع الممبار فى مياه وخل وملح ودقيق لمده ساعتين ويغسل بعد ذلك جيدا، بعد ذلك توضع كل هذه المكونات مع السمنه ومكعب المرقه وتخلط جيدا فى إناء، بعد ذلك نقوم بحشى الممبار بالخلطه، وبعد حشيه بس مش نملاه رز قوى نخليه مبطط ونسيب فراغ من الناحيتين عشان نراعى ان الرز حجمه هيتضاعف لما نسلق الممبار لما نخلص الحشو كلهم نجيب حله وفيها ميه مغليه ونحط ورق لورى وحبهان
ملح وفلفل صحيح بصلة جزرة طمطماية.
علشان الزفر تغلى نسقط الممبار ونسلقه لمدة ساعه ونطلعه من السلق فى مصفه ينزل اى سوايل به ونعصر عليه ليمون ونحمرة فى طاسه بها زيت غزير ويزين بالبقدونس ويقدم وبالف هنا.


3- الكرشة بالحمص

طريقة تحضير الكرشة بالحمص
طريقة تحضير الكرشة بالحمص

المقادير
كرشة مسلوقة و مقطعة قطع صغيرة
كوب عصير طماطم
بصلة متوسطة مفرومة
نص كوب حمص (حمص الشام ) مسلوق نص سلق
معلقة سمن كبيرة 
نص رأس ثوم + ملح فلفل + كمون 
كوب و نص من ماء سلق الكرشة


طريقة تحضير الكرشة بالحمص

نضع السمن فى حلة و نحمر فيها البصلة لما يصفر نضع الثوم و الحمص و نقلب تقليبتين، و بعدين نحط عصير الطماطم و على نار متوسطة لحد الطماطم ما تتسبك ودة طبعا بانك حتلاقى لونها اتغير و تقلت أضع حوالى كوب و نص من الماء اللى سلقت فية الكرشة اللى الحلة و الملح والفلفل والكمون و نسيبها لحد ما الماء اللى حطناة تغلى نضع الكرشة المسلوقة المقطعة فى الحلة و نقلب و نسيبها على نار هادية لحد ما تستوى و هى مش بتاخد كتير يعنى حوالى 20 دقيقة مثلا و بالهنا و الشفا.


4- المخ البانية

طريقة عمل المخ البانية
طريقة عمل المخ البانية

المقادير
مخ مسلوق 
ملح 
فلفل 
بيض مضروب
دقيق 
بقسماط ناعم 
سمن


طريقة عمل المخ البانية

نقطع المخ اما قطع صغيرة او شرائح، نضع المخ فى الدقيق حيغطية و بعدين نحطة فى البيض و بعدين فى البقسماط، نضع السمن فى مقلاية بس يكون السمن غزير يعنى كتير و نحمر المخ و بالهنا و الشفا.


5- الطرب ( منديل الخروف )

طريقة عمل الطرب ( منديل الخروف )
طريقة عمل الطرب ( منديل الخروف )

المقادير
منديل خروف
كيلو لحم مفروم
بصلة
معلقة بقدونس مفروم
ملح
فلفل
بهارات
1/4 كوب سمن


طريقة عمل الطرب ( منديل الخروف )

يقطع المنديل قطع متساوية بالسكينة على شكل مربعات او مستطيلات، يفرم البصلً ويخلط مع اللحم المفروم والبقدونس والملح و الفلفل والبهارات، يوضع مقدارمن الحشو في وسط كل قطعة من المنديل ثم تلف زى ما بنلف محشى الكرنب على شكل صوابع تخينة نرص الطرب على الشواية او فى الفرن على الرف الشبك وبالف هنا على صحتكم.


6- الكوارع بالدمعة

طريقة عمل الكوارع بالدمعة
طريقة عمل الكوارع بالدمعة

المقادير
2 كوارع مسلوقة
كوب من شوربة سلق الكوارع
ربع كيلو طماطم متصفية
ملح
فلفل
معلقة كبيرة سمن
بصلة صغيرة مفرومة
معلقة كبيرة خل
5 فصوص ثوم


طريقة عمل الكوارع بالدمعة

نضع السمن على النار ونحمر فية البصل ثم الثوم حتى يصفر، نضع الخل على البصل والثوم لحد ما يغلى ثم نضع الطماطم، ونتركها لحد ما تتسبك، ثم نضع كوب شوربة الكوارع ونسيبها لحد ما تغلى، شيلى من عضم الكوارع وضعية فى الدمعة على نار هادية لمدة ربع او ثلث ساعة وتغطيتها اثناء السوى رصصى الكوارع فى طبق التقديم وصبى عليها الدمعة ( الصلصة ) وبالف هنا وشفا.


7- طاجن اللحمة الضانى بالحمص

طريقة تحضير طاجن اللحمة الضانى بالحمص
طريقة تحضير طاجن اللحمة الضانى بالحمص

المقادير
1/2 كيلو لحمه ضانى
1/2 كيلو حمص شام
بصل قورمه (إن لم يوجد نستخدم 3 بصلات كبار مقطه حلقات)
فلفله رومى كبيره
ثمرتين طماطم مقشرين
2 معلقة كبيرة صلصه
حزمة مقدونس
1/4 معلقة صغيرة نعناع ناشف
ملح 
فلفل 
بهارات 
جوزة الطيب


طريقة تحضير طاجن اللحمة الضانى بالحمص

يتم سلق اللحم نصف سليق، ينقع الحمص من اليوم السابق للاستخدام ثم بعد ذلك يغسل جيدا ويوضع له ماء نظيف ويترك ليسلق على النار، نضع فى الحله زيت ثم البصل ويتم التقليب إلى انا ان يحمر دهبى فاتح ثم يوضع الفلفل الرومى ويقلب قليلا، ثم نضع اللحم ويقلب خمس دقائق، وبعد ذلك نضيف الحمص والطماطم المقطعة ونتركهم على نار هادئة حتى تتشرب ما بها من ماء ثم نضيف الصلصه والملح والفلفل والبهارات وجوزة الطيب ونقلب ثم نضع الشوربه التى تم سلق اللحمه بها وعندما تقترب من الانتهاء نضع البقدونس والنعناع ونتركهم دقيقتين ثم نطفئ وبالف هنا.


8- كبدة بالدقة

طريقة عمل كبدة بالدقة
طريقة عمل كبدة بالدقة

المقادير
½ كيلو كبدة بتلو
1/2 راس ثوم مهروس
3 معالق زيت
عصير ليمون
معلقة كبيرة بقدونس مفروم
ملح وفلفل وكمون


طريقة عمل كبدة بالدقة

تغسل الكبدة كويس بالماء والخل، وتشطف بالماء وتقطع شرائح رقيقة، ندهن مقلاية بالزيت ونشوح فيها الكبدة كويس على نار عالية لحد ماتستوى ونشيلها من على النار، نخلط كل مقادير الدقة اللى عندنا مع بعض الثوم والبقدونس و عصير الليمون والملح والفلفل والكمون ونضعهم على الكبدة أول ما تنزل من على النار ونقلبهم كويس لحد ما الدقة تتخلط كويس بالكبدة ونقدمها ساخنة.


9- كبدة الكباب حلة

طريقة عمل كبدة الكباب حلة
طريقة عمل كبدة الكباب حلة

المقادير
1/2 كيلو كبدة
3 معالق سمنة
1/2 رأس ثوم
كوب عصير طماطم
ملح + فلفل + بهارات


طريقة تحضير كبدة الكباب حلة

بعد مانغسل الكبدة كويس ونجهزها نقطعها مكعبات، اقدحى السمنة وحمرى فيها الثوم (بس يكون مقطع حلقات مش مهروس )، لحد ما لونه يصفر، ضعى مكعبات الكبدة على الثوم وتقلبى وتغطى الحلة وتكون النار هادية لحد ما الكبدة، تنشف مايتها، اضيفى عليها عليها عصير الطماطم و الملح والفلفل والبهارات، اتركيها على نار هادية لحد ما تتسبك وتبان السمنة، حمرى فيها الكبدة وتقدميها.


10- الكبدة بالردة

طريقة عمل الكبدة بالردة
طريقة عمل الكبدة بالردة

المقادير
كيلو كبدة شرائح
رأس توم مفرومة ناعم جدا
ملح + فلفل + نصف ملعقة صغيرة كمون
2 ملعقة كبيرة كزبرة ناعمة 
2 كوب ردة ناعمة 
نص كوب دقيق ( تخلطيهم مع بعض )


طريقة عمل الكبدة بالردة

تبلى الكبدة و ضعى عليها الملح والفلفل والتوم والكزبرة والكمون وقلبيهم كويس وحطيها فى الثلاجة تقريبا ساعتين علشان تشرب من كل التتبيلة كويس، طلعيها من الثلاجة و سخنى الزيت، نضع شريحة شريحة فى خليط الردة بالدقيق و اضغطى عليها با يدك كويس من الناحيتين، و ضعيها فى الزيت لحد ما تحمر من الناحيتين بس خلى بالك الكبدة اساسا بتستوى بسرعة وبالف هنا ليكم.


11- العكاوى بالصلصة

طريقة عمل العكاوى بالصلصة
طريقة عمل العكاوى بالصلصة

المقادير
ذيل 
3 بصلة مبشورة 
معلقة كبيرة سمنة 
معلقة دقيق 
ملح وفلفل وحبهان 
عصير طماطم 


طريقة عمل العكاوى بالصلصة

نغسل الذيل كويس جدا وندعكة كويس بالملح وبعدين نشطفه، وبعدين ندعكه كويس بالدقيق وبعدين نشطفه كويس، افصلى بقى حلقات او فكرات الذيل عن بعض، ثم ضعيهم فى ماء مغل ىالبصلة وتتبلية بالملح والفلفل والحبهان لحد ما يستوى نشوح البصلة المبشورة فى السمنة لحد ماتصفر وبعدين نضع عصير الطماطم لحد ما الصلصة تتسبك وبعدين نضع حلقات العكاوى المسلوقة فى الصلصة نتركها ونقلبها حوالى من 5 ل 10 دقايق بس وتقدم وبالف هنا.


12- اللسان بالكمونية

طريقة عمل اللسان بالكمونية
طريقة عمل اللسان بالكمونية

المقادير
لسان
3 معالق سمنة
2 كوب عصير طماطم
رأس ثوم مهروسة
2 معلقة كمون
ملح وفلفل


طريقة عمل اللسان بالكمونية

نغسل اللسان كويس ونقشط الطبقة الخشنة السطحية وندعكه كويس بالملح وبعدين بالدقيق ونشطفه كويس، نملا حلة بالماء ونضع فيها اللسان على نار هادية لحد ما الماء يغلى براحته وبعد ما يغلى نروح راميين
الماء دة ومغيرينة بماء تانى نظيف وبارد، نضعه بالماء النظيف تانى فى الحلة مع الملح والفلفل والبصلة والحبهان على نار هادية ويترك لحد مايستوى، نشيله من الماء وننزع جلده نقدح السمنة ونحمر فيها اللسان، ثم نضيف له الثوم المهروس والكمون ونقلبهم كويس، نضيف عصير الطماطم والملح والفلفل نتركهم على النار لحد مايغوا ثم نوطى النار لحد ما اللسان يستوى وممكن اذا احتاج تزودى شوية ماء تزوديله لحد مايستوى وبالف هنا وشفا.


13- صينية لسانات خروف بالفرن

صينية لسانات خروف بالفرن
طريقة عمل صينية لسانات خروف بالفرن

المقادير
لسانات خروف
ملح وطحين وخل لفرك اللسانات
2 بصلة كاملة 
بهارات لحمه وفلفل وكمون وقرفه وجنزبيل وجوزة الطيب سبع بهارات حبهان
بطاطس + بصل + طماطم + فصوص تومة كبار + عصير ليمونة


طريقة عمل صينية لسانات خروف بالفرن

نغسل اللسان كويس ونقشط الطبقة الخشنة السطحية وندعكه كويس بالملح وبعدين بالدقيق ونشطفه كويس، نملا حلة بالماء ونضع فيها اللسان على نار هادية لحد ما الماء يغلى براحته وبعد ما يغلى نروح راميين الماء دة ومغيرينة بماء تانى نظيف وبارد، نضعه بالماء النظيف تانى فى الحلة مع الملح والفلفل والبصلة والحبهان، نشيله من الماء وننزع جلده وبشيل الريم من فوق وبغطي عليهم، باخدو بحدود الساعة.
على نار هادية ويترك لحد مايستوى، أثناء سلق اللسانات بنقشر البطاطس والبصل ونقطعهم ونقطع الطماطم، بنقلي البطاطس 1/2 قلية، ندق التوم ونحطه في صحن ونضيف عليها عصير الليمون والملح والتوابل ونخلطهم بناخد اللسانات المستوية وهيّ سخنة علشان تعرفي تقشري جلدها بسهولة، بقطع كل لسان لجزئين بالطول، بصينية الفرن بحط البطاطس واللسانات وأضيفلهم خلطة التوم والليمون وأقلبهم، وأرص فوقهم البصل والطماطم وبضيف على الصينية، حوالي كوبين من مرقة ورشة ملح وفلفل على الفرن الساخن ويترك حتى يستوي وبالآخر بنحمر الوجه وبالف هنا.


14- كرشه بالبطاطس والصلصه

كرشه بالبطاطس والصلصه
طريقة عمل كرشه بالبطاطس والصلصه

المقادير
كيلو كرشه
عصير طماطم
بطاطس مقطعه مكعبات
بصله مفرومه
رأس توم متوسطه مهروسه
ملح فلفل اخضر
فلفل أسود حبهان ومستكه شطة (حسب الرغبه)


طريقة عمل كرشه بالبطاطس والصلصه

أول شئ نغسل الكرشه بالدقيق والملح وبعدين انقعها فى خل وليمون عشان ريحتها وبعدين اسلقها فى مياه سخنه واحط عليها عيدان من القرفه وعود كرفس وجزر واسيبها تغلى شويه اشطفها كويس واحطها فى مصفاه اجيب حله واحط شويه زيت احط الكرشه واحط عليه الخلطه المكونه من التوم المهروس على الكمون والكسبره الناشفه وعليهم الفلفل الاخضر وهرستهم مع بعض واحط المستكه والحبهان واقلبهم يعنى اشوحها لما الثوم يتغير شويه احط البطاطس المكعبات عليها واقلبها شويه وبعدين احط عصير الطماطم، وانا بحط عصير الطماطم بكون مجهزة البصل المفروم وعليه الفلفل الاسود واقلبهم كويس واضيفها عليهم واسيبها تسبك وتستوى ما اخدتش وقت وظبط الملح بتاعها وبالف هنا وشفا.


15- الفشه والطحال

طريقة عمل الفشه والطحال
طريقة عمل الفشه والطحال

المقادير وطريقة عمل الفشه والطحال

نغسل الفشه والطحال بالميه نملا حلة بالماء حتى تغلى ونضع فيها الفشه والطحال على نار هادية لحد ما الماء يغلى براحته وبعد ما يغلى نروح راميين الماء دة ومغيرينة بماء تانى نظيف وبارد نجيب حله فيها ميه وفيها بصل + كرفس + جزر + قرفه + حبهان + ورق لورا + مستكه + قرفه + كمون + فلفل اسود + قرنفل وتترك تغلى ثم نسقط فيها الفشه والطحال نص ساعه او ساعه الا ربع، بعدين ننشلها ونغسلها بميه من الحنفيه نرش عليها شويه كمون حلوين وملح ونقطعها تترك تغلى ثم نسقط فيها الفشه والطحال نص ساعه أو ساعه الا ربع، نرش عليها شويه كمون حلوين وملح وقرفه وجنزبيل ونقطعها نقليها فى الزيت وتخرج وتقدم وبالف هنا.


16- طاجن لحمة الرأس

طاجن لحمة الرأس
طاجن لحمة الرأس

المقادير وطريقة عمل طاجن لحمة الرأس

طبعا غسلت اللحمه كويس صفيتها وسلقتها نص سلقه، بعدين طلعتها من الحله وقلبت عليها عصير طماطم وبصل مقطع شرائح دعكته بالفلفل الاسمر اوى وفلفل مقطع صغير وبهارات مشكله وقرفه وجنزبيل وجوزة الطيب ومعلقتين صلصه طماطم قلبتهم كلهم مع بعض وحطيتهم فى حله وعلى النار يخدوا غلوتين وبعدين ضيفت الملح وقلبت كل الخليط ده فى الطاجن وعلى الفرن لغايه ما يحمر الوش وبالف هنا ليكم.

في النهاية لا يسعنا الا ان نشكركم علي سعة صدركم ونتمني أن يكون هذا الملف الكامل الخاص بأكلات ووصفات عيد الاضحى المبارك عجبت الجميع بإذن الله وكل عام وأنتم بخير، ولا تبخلوا علينا بمشاركة الموضوع على صفحتكم، وفي حالة وجود أى أسئلة أو استفسار أو مقترحات لتطوير طريقة العرض لا تترددوا في مراسلتنا والسلام عليكم ورحمة الله وبركاتة.

شارك الوصفة مع أصدقائك
جميع الحقوق محفوظة لــ مطبخ بيت العيلة 2017 © تصميم كن مدون